13 апреля 2018 г.
.jpg "Хĕрÿ тапхăр хăвăртлăх, пахалăх ыйтать")
Ехремкасси ял тăрăхĕн территорийĕнче техникăна çур аки ирттерме мĕнле хатĕрленине тĕрĕслессипе смотр пулчĕ. Графикпа килĕшÿллĕн уйрăм çынсем те пухăнмаллаччĕ. Александр Порфирьев вара Куракăш ялĕнчен пуринчен те малтан çитрĕ. Нумай çул водительте вăй хунăскер «хурçă ут» штурвалне те çирĕп тытасшăн. Вăл тракторне малтанхи «Правда» хуçалăхран туяннă. Машина-трактор паркĕнче темиçе çул та ахалех ларнăскере çĕнĕ пурнăç панă. «Хурçă ута» тĕплĕн юсанă хыççăн сăрласа сăн кĕртнĕ. Çавна май Александр Всеволодовича районти патшалăх техника тĕрĕслевĕн аслă инспекторĕ Константин Майоров ырласа та илчĕ. Çав хушăрах ăна кăштах асăрхаттарчĕ те. «Çутă фарисене тÿрлетсен аванрах пулатчĕ», - терĕ. Трактор тытакан ытти çынсем вара смотра хутшăнмарĕç. Курăнать, хăйсен техникин юсавлăхĕшĕн питех тăрăшмаççĕ вĕсем.
«Правда» хуçалăх никĕсĕ çинчи хресчен-фермер хуçалăхĕн машина-трактор паркĕнче вара шăплăх хуçаланать. Унта пырса кĕмелли пысăк алăк та çаплах яри уçăлман. Картишĕнче гусеницăллă пĕр трактор кăна мĕскĕнĕн ларать.
Т.Козловăпа Л.Сидорова шут ĕçченĕсем каланă тăрăх, техника гаражра упранать. Паркра пĕр юсавçă та курăнмарĕ.
«Авангард» хуçалăх пирки вара çавна калаймăн. Кунта ырри тÿрех куç тĕлне пулчĕ. Паркра механизаторсем йышлă, тракторсене пĕр вырăна пухса лартнă. Техника тĕрĕслевĕн кунне тахçанах кĕтнĕ тейĕн. «Хурçă утсене» юсаса ĕçе хатĕрлессипе вăй хунă. Карачурасем çур акине çулленех иртерех тухма хăнăхнă. Халĕ те çав ĕмĕт-тĕллевпех пурăнаççĕ. Хуçалăхра кадрсем тĕп вырăнта пулни куç кĕрет. Техника енĕпе ятарлă специалистсем ĕçлеççĕ. Тĕп инженер, механик та пур.
- Техникăна, тĕпрен илсен, опытлă çынсене шанса панă. Алексей Еремеев, Владимир Саввов, Михаил Ферапонтов, Николай Романов хĕрÿ тапхăрта шанăç кÿреççĕ, - хыпарларĕ Михаил Кириллов тĕп инженер. - Техника та чăхăмламах кирлĕ мар. Кашнинех тĕплĕ юсама тăрăшрăмăр.
Районти патшалăх техника тĕрĕслевĕн ертÿçи Константин Майоров вара кашни тракторпа прицепах тĕплĕ тишкерчĕ, ĕçлеттерсе пăхма та ыйтрĕ. Çапла пур механизатора та хăйне май экзамен тытма тиврĕ. Петр Петров çамрăк механик, сăмахран, чăн-чăн техника тусĕ пулни курăнчĕ. Ытти «хурçă ут» хуçисем те пит парăнсах каймарĕç. Михаил Ферапонтов, сăмахран, кулленех ĕçре. Фермăран уйрăлмасть вăл, выльăх-чĕрлĕхе валли утă-улăм, сенаж-силос турттарсах тăрать. Çавна май техника яланах юсавлă пулмаллине тĕпе хурать. Тĕрĕслеве те кăмăлпах хутшăнчĕ, хăш-пĕр пысăках мар кăлтăксене çывăх вăхăтрах пĕтерме пулчĕ.
- Смотр тĕрĕслевĕ витĕр пурĕ 9 техника тухрĕ, çав шутра 6 трактор тата 3 прицеп. Техникăна хăрушсăрлăх техникине пăхăнса ĕçлеттерме тăрăшни курăнать. Иртнĕ çулсенче прицепсен тормоз тытăмĕ çукчĕ. Халĕ ку çитменлĕхе пĕтернĕ, - палăртрĕ Константин Анатольевич.
Ака-сухара хăватлăрах техникăпа усă курма пуçлани те аван. «Беларусь-1221», «Беларусь-892», «Т-150» тракторсем хĕрÿ тапхăрти ĕç-хĕле чылай хăвăртлатма май параççĕ. Сергей Петров ертÿçĕ каланă тăрăх, акма çĕр хатĕрленĕ çĕрте дисклă сÿрепе анлă усă курма шутлаççĕ. «Беларусь» тракторсене акара малтанхи пек пĕр сеялкăпа мар, икĕ сеялкăпа ĕçлеттересшĕн.
Тĕрĕслев тенинче çитменлĕх тупăнатех. Хăш-пĕр тракторсен çутă тытăмĕ йĕркеллех маррине асăрхаттарчĕ Константин Майоров. Техника çителĕклĕ пек курăнчĕ. Механизаторсем енĕпе те чăрмав пулма кирлĕ мар. Çур акинче усă курма минераллă удобрени кÿрсе килнĕ. Çунтармалли сĕрмелли материалсем те çывăх вăхăтрах туянма палăртнă. Вăрлăх хатĕрлес енĕпе çулленех ĕçе япăх мар йĕркелеççĕ карачурасем. Акмалли тырра кăçал та аланă. Анчах та пур вăрлăх та кондициллĕ мар иккен. РФ Ял хуçалăх центрĕн Элĕкри уйрăмĕнчен пĕлтернĕ тăрăх, шăтаслăхĕ япăхраххи те пур.
Ака-суха вăхăтĕнче хуçалăхра столовăй ĕçлемелле. Механизаторсем патне уй-хире вĕри апат илсе тухма палăртнă.
Елена ТИМОФЕЕВА.