04 мая 2018 г.
Элĕкри тĕп вулавăша халăх йышлă çÿрет. Кунта кашни кун тенĕ пекех тĕрлĕрен мероприяти иртет. Акă вулавăш каçĕ те çиччĕмĕш çул иртет. Кусенче кĕнекепе тивĕçтерекен пай ертÿçи Зоя Удякова тата Оксана Бархаткина килĕшÿллĕ ĕçленине палăртас килет. Вĕсем хăйсен ĕçне юратса пурнăçлани куç кĕрет. Тĕрлĕ ыйтупа калаçма та кăмăллă. Вулакансемпе вашават, кирек епле литературăпа та вăхăтра тивĕçтереççĕ. Кĕнекесемпе чĕрĕ çынпа калаçнă пекех пуплеççĕ. Унсăр пуçне паллă кунсемпе, уявсемпе çыхăннă кĕнеке куравĕсене улăштарсах тăраççĕ. Çĕнĕ кĕнекесен çÿлĕкĕсем те пуян. Вулавăш пÿлĕмĕнче ларма та кăмăллă. Ку хутĕнче вулавăша Элĕк салинчи тата çывăхри ялсенчи вулакансем пуçтарăнчĕç. Уява Зоя Вольфредовна уçрĕ. Вăл вулавăш каçĕ мĕнле, хăçан пуçланса кайни çинчен, мероприятин программипе паллаштарчĕ. Оксана Валериановна И.Я.Яковлев чăваш халăхĕшĕн тунă пархатарлă ĕçĕсем çинче чарăнса тăчĕ. Районти ветерансен хорĕ юрăсем парнелерĕ. Чăваш Республикин культурин тава тивĕçлĕ ĕçченĕ Любовь Константинова чăвашлăх çинчен сăвăсем вуларĕ. Эпĕ хам çырнă сăвăсем каларăм. Элĕк вăтам шкулĕнче чăваш чĕлхипе литературине вĕрентекен Елена Венедиктова И.Я.Яковлев çырнă «Халал» сыпăкĕсене вуларĕ, «Ÿкĕт» тата ытти хайлавĕсемпе паллаштарчĕ. Çавăн пекех районти Хĕрарăмсен канашĕн председателĕ Василиса Архипова та хастарлăхпа палăрчĕ. Тухса калаçакансем хăйсен шухăшĕсемпе чуна тыткăнларĕç. Çак каçпа пурте кăмăллă юлчĕç. Чăваш чĕлхи - анне чĕлхи. Вăл нихăçан та пĕтмĕ.
Елена ИЛЬИНА, Качалав ялĕ.