08 мая 2018 г.
Май уйăхĕн 6-мĕшĕнче Раççей Федерацийĕн Федераци Пухăвĕн Патшалăх Думин депутачĕ Николай Малов Элĕк, Хĕрлĕ Чутай, Етĕрне районĕсенче пурăнакан вăрçă тата тыл ветеранĕсемпе тĕлпулу ирттерчĕ. Йăлана кĕнĕ тăрăх, çулсеренех вăл Етĕрне районĕнче Аслă Çĕнтерÿ уявĕ умĕн иртет. Ку хутĕнче те уява шурă çÿçлĕ салтак ветерансем, тăнăç пурнăçа çывхартассишĕн сахал мар тылра ĕçленĕ кинемейсем йышлăн килнĕ. Апла пулин те ытти çулсемпе танлаштарсан вĕсен шучĕ чакни сисĕнет. Элĕк районĕнчен унта Илленушкăньри Аркадий Владимирович Деведеров, Элĕкри Гурий Константинович Терентьев, Юнтапа тăрăхĕнчен Николай Иванович Иванов, Петр Кондратьевич Кондратьев хутшăнчĕç. Çавăн пекех вĕсен хушшинче вăрçă вут-çулăмĕ витĕр тухнă Юнтапа енчи 90-ри Андрей Аркадьевич Аркадьева та курма чăнахах та кăмăллă пулчĕ.
«Хисеплĕ пирĕн ветерансем, сире паян çакăнта таса та сывă курни пирĕншĕн чăн-чăн телей. Паян çĕр çинче пурăнакан ăру тата çитĕнсе пыракан ачасем сирĕн умра яланлăхах парăмра. Эсир хăвăр пурнăçăра шеллемесĕр çапăçăва кĕнипе тата ĕçре ырми-канми тăрăшнипе пире тăнăç тата ирĕклĕ пурăнма май туса панишĕн пысăк тав сире. Хăш чухне паян иртнĕ фактсене пăсма пăхаççĕ, çапла майпа пирĕн çĕршыв фашизма хирĕç тăнинче мĕнле тÿпе хывнине улăштарасшăн. Апла пулин те эпир малтанхи пекех пурте пĕрле. Çак пĕрлĕх ĕнтĕ пире тата пирĕн патшалăха пĕрре мар йывăрлăхсене çĕнтерме пулăшнă. Паян Эсир пирĕнпе юнашар пулнишĕн мăнаçланатпăр. Сире малашне те çирĕп сывлăх, вăрăм ĕмĕр тата ырлăх сунатăп», - ветерансене саламланă май палăртрĕ Николай Владимирович.
Çавăн пекех пухăннă ветерансене Етĕрне, Хĕрлĕ Чутай район администрацийĕсен пуçлăхĕсем Андрей Софронов, Александр Башкиров, Етĕрнепе Хĕрлĕ Чутай районĕсенчи çар ĕç комиссариачĕн пай начальникĕ Александр Прокопьев, Етĕрне районĕн прокурорĕ Юрий Фуражников саламларĕç.
- Раççей Президенчĕ Владимир Путин Аслă Çĕнтерÿ тунăранпа 70 çул иртнĕ хыççăнхи кашни Çĕнтерÿ кунĕ пирĕн юбилей уявĕ пек пулмаллине палăртнăччĕ. Шел те, ветерансен шучĕ çулсеренех чакса пырать. Çавăнпа та пирĕн, патшалăх влаçĕн çеç мар, общественнăçăн паянхи тĕп тивĕç вăл - вăрçă вут-çулăмĕ витĕр тухнă ветерансене манманни, кулленех вĕсене тимлĕх уйăрни. Тавта пуç сире, - саламланă май палăртрĕ Элĕк район администрацийĕн пуçлăхĕ Александр Куликов.
Тĕлпулу вăхăтĕнче ветерансем тепĕр хут синкерлĕ те йывăр самантсене, вăрçа ăсаннине, хаяр çапăçусене кĕнине, фронтра çухатнă юлташĕсене аса илчĕç.Тыл ĕçченĕсем вара салтаксене пулăшас тĕлĕшпе канмасăр талăкĕ-талăкĕпе ĕçленине каласа пачĕç. Кашнин аса илĕвех пĕр-пĕринчен уйрăлса тăчĕ. Етĕрнери ÿнер шкулне çÿрекен ачасем тата вырăнти пултарулăх ушкăнĕ ветерансене вăрçă çулĕсене тата çамрăклăхне аса илтерекен юрра-кĕвве парнелерĕç.
Тĕлпулу вĕçĕнче Раççей Федерацийĕн Федераци Пухăвĕн Патшалăх Думин депутачĕ Николай Малов ветерансене тепĕр хут çывхарса килекен Аслă Çĕнтерÿ кунĕ ячĕпе саламласа асăнмалăх чечек тата парнесем пачĕ.
Эльвира КУЗЬМИНА.