11 мая 2018 г.
Майăн 5-мĕшĕнче «Хĕлхем» спорт шкулĕн стадионĕнче çăмăл атлетсем республика шайĕнчи ăмăртăва хутшăнчĕç. Хальхинче ăна пирĕн ентеше – РСФСР тава тивĕçлĕ тренерне Василий Семенович Семенова асăнса йĕркелерĕç.
Ăмăртăва савăнăçлă лару-тăрура уçрĕç. Кунта ЧР физкультурăпа спорт министрĕ Сергей Шелтуков, район пуçлăхĕ Владислав Волков, район администрацийĕн пуçлăхĕ Александр Куликов хутшăнчĕç.
Ентешĕмĕре хисеп туса Элĕк тăрăхне яланхи пекех чылай хаклă хăна пухăннă. Кунта – Василий Семенович ĕçтешĕсем, воспитанникĕсем, спорта кăмăллакансем. Вĕсен йышĕнче - Раççей тава тивĕçлĕ спорт мастерĕ, икĕ хут тĕнче чемпионки, Европа чемпионки, XXVIII Олимп вăййисен кĕмĕл призерĕ Олимпиада Иванова, Раççей тава тивĕçлĕ спорт мастерĕ, Европа чемпионачĕн кĕмĕл призерĕ, команда первенствинпе Европа тата тĕнче Кубокĕн çĕнтерÿçи, XXVII çуллахи Олимп вăййисен пăхăр призерĕ Владимир Андреев, хăвăрт утассипе Олимп чемпионки Елена Николаева ячĕллĕ 8-мĕш № Олимп резервĕсен спорт шкулĕн директорĕ, тĕнче тата Европа чемпионки, XXV Олимп вăййисене хутшăннă Алина Иванова, хăвăрт утассипе Олимп чемпионки Елена Николаева ячĕллĕ 8-мĕш № Олимп резервĕсен спорт шкулĕн директорĕн çумĕ, тĕнче класлă СССР спорт мастерĕ, Чăваш Республикин физкультурăпа спортăн тава тивĕçлĕ ĕçченĕ Олег Андреев, Чăваш Ен Спорт министерствин Чăваш Республикин А.Игнатьев ячĕллĕ спорт енĕпе пĕрлехи командăсене хатĕрлекен центр директорĕ Игорь Кудряшов, Чăваш наци конгресĕн президиумĕн пайташĕ Владимир Иванов профессор. Çавăн пекех мероприятие Василий Семеновичăн çывăх çыннисем – шăллĕ Виктор Семенович тата хĕрĕ – Надежда Васильевна хутшăнчĕç. Сăмах май, Виктор Семенович пурнăçĕ те спортпа тÿрремĕнех çыхăннă. Вăл çăмăл атлетикăпа тĕнче класлă СССР спорт мастерĕ, виçĕ хут тĕнче чемпионĕ, СССР тата РСФСР тава тивĕçлĕ тренерĕ, XXI Олимп вăййисене хутшăннă.
Сергей Шелтуков министр спорт уявне уçнă май Элĕксене чылай енчен ăмсанмаллине пĕлтерчĕ. «Паян пухăннă хăнасене çăлтăрсен пуххипе танлаштармалла. Нихăш спорт тĕсĕ те кун пеккипе мухтанма пултараймасть. Сире саламлама çĕршыв чемпионĕнчен пуçласа тĕнче чемпионĕ таранах килсе çитнĕ. Çакă пĕтĕмпех Василий Семенович пысăк вĕрентекен тата спорт ĕçне йĕркелеме пултарнă çын пулнипе çыхăннă. Унăн ĕçĕ паянхи çамрăксемшĕн тĕслĕх пулма тивĕç. Спорта кăмăллакансем хамăр патрах пысăк çитĕнÿсем кăтартма пулараççĕ. Кăна валли тренерсем çителĕклĕ», - терĕ шкул ачисене çитĕнÿсем тума ăнăçу сунса.
Хăвăрт утассипе тата чупассипе Элĕк, Муркаш, Шупашкар районĕсемпе Шупашкар хулин спортсменĕсем тухрĕç. Вĕсен йышĕнче Мордва Республикинчен килнĕ çамрăксене курма та кăмăллă пулчĕ. Пĕтĕмпе старта тухнисен йышĕ 100-е çитрĕ.
Элĕк тăрăхĕнче иртнĕ ăмăртура выляса яракансем пулмарĕç пулĕ. Çĕнтерÿçĕсем Чăваш Ен спорт министерствин дипломĕсене, парнесемпе медальсене тивĕрĕç пулсан, пьедестал çине хальхинче хăпарайманнисем те кăмăла хуçмарĕç. Ентешсемпе курнăçни те, спортри кумирсемпе тĕл пулни те пысăк парне пулчĕ.
М. МИХАЙЛОВА.