29 мая 2018 г.
Йышлăн та пысăк шайра ирттертĕмĕр майăн 25-мĕшĕнче регионсем хушшинчи чăваш эстрада юррисен «Вирьял шевлисем» фестивальне. Кăçалхипе 23-мĕш хут пулчĕ вăл Элĕкре. Çанталăк ытти чухнехинчен сивĕрех пулни те юрăçсемпе ташăçсен, курма килнисен кăмăлне хуçаймарĕ.
Кăнтăр апачĕ тĕлнех пухăнма пуçларĕç-ха асăннă мероприятие хутшăнакансем. Ку хутĕнче хăйсен ăсталăхĕпе Элĕк, Комсомольски, Хĕрлĕ Чутай, Муркаш, Вăрмар, Шупашкарпа Çĕмĕрле, Вăрнар районĕсенчи, Шупашкарпа Самара хулисенчен килнисем хăйсен пултарулăхĕпе паллаштарчĕç.
Смотр-конкурсран фестивале çити
«Вирьял шевлисем» фестиваль çамрăксемшĕн хăйне евĕрлĕ старт илмелли лапам пулнине пĕрре мар илтнĕччĕ-ха. Ку шухăша вара ăна йĕркелесе ирттерекенсем çеç мар-ха, хутшăнакансем те çирĕплетеççĕ. Сăмахран, акă, хамăр ентешех, Шĕмшеш тăрăхĕнче çуралса ÿснĕ Людмила Засыпкина та çавнах палăртать. «Кăçалхипе 4-мĕш хут хутшăнатăп фестивале. Пĕлтĕр Гран-прие тивĕçнĕччĕ. Ун хыççăнах «Кĕмĕл сасă» лауреачĕ пулса тăтăм. «Студентсен çуркуннинче» 1-мĕш степеньлĕ диплома тивĕçрĕм. Ун хыççăнах Чăваш Наци конгресĕпе пĕрле Тюменьре Ыр кăмăллăх акцине хутшăнтăм», - пĕлтерет вăл.
Самара облаçĕнчи Андрей Емельянов та асăннă фестиваль çинчен темиçе çул каяллах илтнĕ. Кăçал вара хутшăнма тĕв тытса Элĕке килнĕ те. Çавăн пекех Хĕрлĕ Чутай районĕнчи «Штаваш», Елчĕк тăрăхĕнчи Çĕнĕ Пăва ялĕн клубĕ çумĕнчи «Камбрэ» ушкăнсем те, Вăрнар районĕнчи ташăпа юрă ансамблĕн «Тивлет» коллективĕ те асăннă мероприятие пĕрремĕш хут тухнине палăртрĕç. Çакăнтан çул татах та уçăласса шаннине пĕлтерчĕç.
- 1995 çулта «Вирьял шевлисем» мероприятие пуçласа смотр-конкурс евĕр йĕркелерĕмĕр. Унăн тĕп тĕллевĕ хамăр тăрăхри тури чăвашсен юрри-кĕввине çитĕнсе пыракан ăрусемшĕн упраса хăварасси, ку тĕлĕшпе чи пултаруллисене тупса палăртасси пулнă. Ун чухне уйрăм юрлакансемпе пĕрлех вокалпа инструментсен ансамблĕсем те хутшăннăччĕ. Çулсем кайнăçемĕн фестиваль пулса тăчĕ вăл, унта хутшăнакансен шучĕ те ÿсрĕ. Раççейĕн тĕрлĕ кĕтесĕнчи чăвашсем килме кăмăл туни хăпартлантарать мана, - пĕлтерет Альберт Сергеев, «Трактор историйĕ» наукăпа техника музейĕн директорĕ. Ку ĕçре унăн тÿпи уйрăмах пысăк пулнине палăртмалла. Фестивале йĕркелесе яраканĕ вăл-çке.
Уява кăçал пĕрремĕш хут хутшăнакан Чăваш Республикин Культурăпа ÿнер институчĕн профессорĕ Ботурджан Кадирович Каримов та çакăн йышши мероприятисем чи пултаруллисене тупса палăртма май панипе пĕрлех чăвашлăха упраса хăварас тата йăла-йĕркене çитĕнекен ăрăва вĕрентсе пырас ĕçре пысăк пĕлтерĕшлĕ пулнине палăртса каларĕ. Малашне те уяв ят-сумне ÿстерсе пыма сĕнчĕ.
Чăваш Республикинчи эстрада артисчĕсен пĕрлĕхĕн Президенчĕ, хамăр ентеш Алина Федорова та, Чăваш Наци конгресĕн вице-президенчĕ Валерий Клементьев та Элĕксемпе мăнаçланнине палăртĕç.
Пултарулăхĕ иксĕлми
Уява йĕркелесе ирттерессишĕн сахал мар тимлеме тивнĕ яваплă çынсен. Ку ĕçе вара Элĕк-ри культурăпа кану çурчĕн артисчĕсем çеç мар, ача-пăча ÿнер шкулĕн вĕренекенĕсем те хастар хутшăнни çирĕплетет. «Вирьял шевлисем» фестивале килекен артистсене çав териех ĕнентерÿллĕ сăнласа кăтартрĕç флешмобра пĕчĕк çăлтăрчăксем. Мероприятие хамăр ентешех - Мăн Вылă каччи Александр Никифоров Олег Вунберпа ертсе пычĕç. Артистсене район администрацийĕн пуçлăхĕ Александр Куликов саламласа ăнăçу сунчĕ. Фестивальте çĕнĕ çăлтăрсем «çураласса» шаннине пĕлтерчĕ.
Сцена çине пĕрин хыççăн тепри юрăçсем, ташă коллективĕсем тухрĕç. Кăçалхи фестивале тĕрлĕ çĕртен ташă коллективĕсем ытларах килни сисĕнчĕ. Конкурс пĕтĕмлетĕвĕсем тăрăх, «Вокал» номинацире Гран-прие Муркаш районĕнчи Евгений Тимофеев тивĕçрĕ. «Чи лайăх солист» номинацире Хĕрлĕ Чутай районĕнчи Владимр Егоров пĕрремĕш вырăна тухрĕ. Çавăн пекех Самара хулинчи Андрей Емельяновпа Муркаш районĕнчи Елена Филиппова малти вырăнсене тивĕçрĕç. «Çемьесен чи лайăх вокал ансамблĕ» номинацире Муркашри «Сеспель», 2-мĕш вырăна - Элĕк районĕнчи Сергей Ивановпа Людмила Засыпкина, 3-мĕшне Муркашри Еленăпа Лариса Аксендаровăсем тухрĕç. Хореографи коллективĕсенчен вара «Халăх ташши» номинацире Элĕкри «Ладушки», «Паянхи ташă» номинацире Мария Ефимова çĕнтерÿçĕсем пулса тăчĕç. Район çыннисемпе уява килнĕ хăнасем чăваш эстрада артисчĕсен Константин Рязанов, Алена Арсентьева, Лариса Федорова тата «Çиларман» ушкăн юррисене итлесе киленчĕç. Уяв салют панипе вĕçленчĕ.
Э.ЭЛИНА.