Публикации » Экзаменсем пыраççĕ

01 июня 2018 г.

Районти шкулсенче 9-мĕш тата 11-мĕш классенче вĕренекенсемшĕн хĕрÿ тапхăр пырать. Тулли мар вăтам тата вăтам пĕлÿ пĕтерни çинчен çирĕплетекен аттестата алла илме Пĕрлехи патшалăх экзаменĕсене тытаççĕ вĕсем. Май уйăхĕн 25-мĕшĕнче 9-мĕшĕнче вĕренекен 3 ача хăйсем суйласа илнипе Вăрнар шкулĕнче акăлчан чĕлхипе пĕрремĕш экзамен тытнă. Кăтартăвĕсем япăх мар. Асăннă кунах чăваш чĕлхипе 33 ача тĕрĕслев ĕçне пурнăçланă. Кусем те пурте патшалăх аттестацийĕ витĕр тухнă. Çавăн пекех 9 класс пĕтерекен 165 ача вырăс чĕлхипе патшалăх тĕрĕслевĕн ĕçĕсене пурнăçланă. Майăн 31-мĕшĕнче районти вĕренÿ учрежденийĕсенче тулли мар вăтам пĕлÿ илнĕ 88 ача Элĕкри вăтам шкултах хăйсен ирĕкĕпе обществознани, 57 вĕренекен биологи, 4 ача информатика предмечĕсемпе экзаменсем тытнă. 9-мĕшсем хушшинче сывлăх енчен хавшакрах 2 ача пулнăран вĕсене те ыттисемпе танах экзамен тытма пĕтĕм условисем туса панă. 11-мĕшсем вара 70 ача математика предмечĕн Пĕрлехи патшалăх экзаменĕн база пайне çырнă. Тĕрĕслев ĕçĕсене пурнăçланă вăхăтра йĕркене пăснă тĕслĕхсене тупса палăртман.