19 июня 2018 г.
Çу кунĕсенче ял çыннисен ĕçĕ-хĕлĕ виçесĕр теме юрать. Пĕрин хыççăн тепри хушăнсах пыраççĕ. Ял хуçалăх организацийĕсем, хресчен-фермер хуçалăхĕсем тĕш тырă культурисене акса-лартса пĕтерчĕç те лăпланчĕç тесе калаймăн. Тыр-пулă, çĕр улми, пахча çимĕç пăхса ÿстерессипе те вăй хумалла. Çавна май районта çум курăксене пĕтерес, чир-чĕрпе хурт-кăпшанкăна хирĕç кĕрешес тĕлĕшпе ĕçсем хĕрсех пыраççĕ. Хуçалăхсем калча уйĕсене хими препарачĕсемпе им-çамлассине йĕркелеççĕ. Ку енĕпе ĕçе «Новый путь», «Авангард», Ульянов ячĕллĕ, «Алмаз» тата хресчен-фермер хуçалăхсенче те япăх мар туса пыраççĕ.
«Симĕс ĕççи» тапхăрĕ те вăй илчĕ. Июнĕн 18-мĕшĕ тĕлне илсен, нумай çул ÿсекен курăксене 550 гектар çулнă. Çак ĕç «Новый путь» хуçалăхра уйрăмах ăнăçлă пырать. Кунта курăксене 400 гектар çулнă. Чăвашсурăмсемпе Шĕвĕшсем тата Юлăшсем выльăх апачĕ хатĕрлессипе те ырă тĕслĕх кăтартаççĕ. Хуçалăхра сенаж 700 тонна янтăланă.
Çĕр улми уйĕсене те тимлĕх кирлĕ. Ку таранччен ретсем хушшинче 210 гектар кăпкалатса çемçетнĕ. Çак ĕçе С.Волков, М.Журавлев, В.Узянов ертсе пыракан хресчен-фермер хуçалăхĕсенче кирлĕ пек йĕркеленĕ. Кĕр тыррисене акма çĕр хатĕрлессипе те халех çине тăмалла. Ку ĕçе «Новый путь», «Авангард» хуçалăхсем пуринчен те малтан тытăннă.
Е.ИВАНОВА.