26 июня 2018 г.
Иртнĕ кунсенче Крымсарайкка ял тăрăхĕнче «Авалхи çынсен çул-йĕрĕпе» велочупу иртнĕ. Ăна «Юрататăп сана, манăн Чăваш Ен: Элĕк районĕ» проектпа килĕшÿллĕн йĕркеленĕ. Çавна май çут çанталăка тухса курассине те палăртнă.
Велочупăва ачасем хутшăннă. Вĕсемпе вырăнти библиотекарь Альбина Архипова эмел курăкĕсем пирки экскурси ирттернĕ. Мероприяти сывлăха çирĕплетес тĕлĕшĕнчен те усăллă пулса тухнă.
Чупăвăн маршручĕ те вăрăм пулнă. Çавна май çак мероприятие хутшăнакансем пулă ĕрчетекен патне çитсе килнĕ. Пулла çÿреме юратакансем тĕрлĕ пулă тытса киленнĕ. Киремет варĕнче те авалхи йăла-йĕркепе паллашнă велосипедпа экскурсие тухнисем.