26 июня 2018 г.
Июнĕн 25-мĕшĕнче Раççей статистикĕсем професси уявне - Статистика ĕçченĕн кунне - паллă турĕç.
Хальхи вăхăтра статистика патшалăх тата общество пурнăçĕн кашни еннех çавăрса илет. Вăл социаллă, экономика тата ытти енсемпе официаллă информаци пуçтарас тĕлĕшпе ĕçлет. Паянхи кун патшалăх статистикин федераци служби хăйĕн ĕç-хĕлне территорилле органсем урлă йĕркелесе пырать. Росстатсăр пуçне вăл е ку сферăри ĕç-хĕле статистика информацине пуçтарас енĕпе патшалăх влаçĕн ытти федераци органĕсем те пурнăçласа пыраççĕ.
Раççей патшалăх статистикин ĕçне Чăваш Республикинче Федераци службин Чăваш Енри патшалăх статистикин территорири органĕ (Чăвашстат) тытса пырать. Пысăк пĕлтерĕшлĕ статистика мероприятийĕсем валли - Пĕтĕм Раççей халăх тата Ял хуçалăх çыравĕсене хатĕрленес, ирттерес, кăтартусене пухас енĕпе уйрăм çынсене явăçтараççĕ.
Хальхи йышши цифра технологийĕсемпе усă курни палăртнă вăхăт тĕлне тĕпчевсене пĕтĕмĕшлех тата суйласа ирттерме, пухса пĕрлештернĕ пĕтĕмлетÿсене те оперативлă майпа йĕркелеме пулăшаççĕ. Сăмахран, смартфонсем апат-çимĕç таварĕсен тата çăмăллăхсен хакне регистрациленĕ чухне пысăк пулăшуçăсем пулса тăчĕç. 2016 çулта Пĕтĕм Раççей ял хуçалăх çыравĕ вăхăтĕнче респондентсенчен планшетпа усă курса ыйтăм ирттернĕ. 2020 çулта та халăх çыравĕнче персонала асăннă хатĕрпе усă курса ĕçлеттерме палăраççĕ. Çыравăн пичет хучĕсемпе танлаштарсан, вĕсем оперативлăрах, статистика кăтартăвĕсене пухма май параççĕ. Малашне Раççейре пурăнакансем хăйсем тĕллĕн патшалăх пулăшăвĕн порталĕпе усă курса Интернетри анкетăна тултарма та пултарĕç.
Информаци ресурсĕсем патшалăх структурин, наукăпа ĕç таврашĕнчи представительсене, массăллă информаци хатĕрĕсене тата халăха кирлĕ. Кашни категори валлиех статистика информацийĕ управлени, маркетинг тата вĕренÿ енĕпе кулленхи ыйтусене татса памалли шанчăклă никĕс пулса тăрать.
Экономика аталанăвĕнче те, социаллă пурнăçра та цифра кăтартăвĕсем питех те кирлĕ. Официаллă статистика майĕпен çĕнĕлле ĕçлекен технологи никĕсĕ çине куçать.
Анжелика СИЛИВЕСТРОВА.