Публикации » Ăсату каçĕ - ачалăхри юлашки уяв

26 июня 2018 г.

Шкултан вĕренсе тухни - пирĕн пурнăçри чи пăлхануллă самантсенчен пĕри. Пĕр шухăшсăр ачалăх, шавлă тăхтавсем, уроксене тивĕçлипе хатĕрленмесĕр кайнă самантсем хыçа юлнă ĕнтĕ. Пурнăçăн çĕнĕ тапхăрĕ пуçланать. Ăсату каçĕ - ĕмĕрлĕхех асра юлакан уяв.

Июнĕн 23-мĕшĕнче районти мĕнпур вĕренÿ учрежденийĕнче ăсату каçĕсем иртрĕç. Шăп та шай çак кун ĕнтĕ 11-мĕш класран тухакан 70 çамрăк шкул пĕтернине çирĕплетекен аттестата алла илчĕ.

Вĕсенчен 13-шĕ вара вĕренÿре, тĕрлĕ шайри олимпиадăра, спортра, шкул пурнăçĕнче палăрнăран çеç мар, пысăк çитĕнÿсем тунăран ылтăн медале тивĕçнĕ. Яланхиллех вĕсен шучĕ И.Я.Яковлев ячĕллĕ Элĕкри вăтам шкулта йышлă пулнă. Кăçал ачалăхпа сыв пуллашакан 38 вĕренекенрен 10-шĕ ылтăн медале тивĕçнĕ. Вĕсене вара ятранах палăртассăм килет: Наталья Волкова, Анна Романова, Евгений Андреев, Диана Гринева, Анастасия Ефимова, Евгений Марков, Эльвира Путерова, Анастасия Петрова, Ирина Свисткова, Валентина Терентьева. Юнтапари Людмила Макаровăпа Елена Ефимова тата Чăваш Сурăмĕнчи Ирина Тихонова та вĕренĕве ылтăн медальпе вĕçленĕ.

Çавăн пекех июнĕн 23-мĕшĕнче 9-мĕш класс пĕтернĕ 165 ача та тулли мар вăтам пĕлÿ илнине çирĕплетекен аттестата алла илнĕ. 13 шкул ачи вĕренÿре тăрăшулăхпа палăрнăшăн ыттисенчен уйрăлса тăракан аттестата тивĕçнĕ.

Элĕкри вăтам шкултан вĕренсе тухакан илемлĕ кĕпе-костюм тăхăннă хĕрсемпе каччăсем, вĕсене пурнăçăн анлă çулĕ çине тухма пулăшнă педагогсем тата кирек епле самантра та яланах юнашар пулнă, тĕрлĕ йывăрлăха пĕрле парăнтарнă ашшĕ-амăшĕ чи малтанах культурăпа кану çуртне пухăнчĕç.

11 класс пĕтернине çирĕплетекен аттестата илнĕ ятпа Элĕк район пуçлăхĕ, И.Я.Яковлев ячĕллĕ вăтам шкул директорĕ Владислав Волков саламларĕ.

- Хисеплĕ выпускниксем! Паянтан кашнин пурнăçĕнчех çĕнĕ страница уçăлать. Малашне те хăвăр суйласа илнĕ професси вĕренвĕнче ăнăçу пултăр. Хăвăр тĕллевĕре пурнăçа кĕртессишĕн çине тăма ан шикленĕр. Çак тапхăрччен яланах сирĕнпе юнашар пулнă вĕрентекенсене тата аçăр-аннĕре мĕн ĕмĕр  тăршшĕпех асра тытасса шанатăп. Шăп та шай вĕсем вăй-халне шеллемен, чун ăшшине, пĕлĕвне тата хăйсен опытне панă. Шкулта пухнă пĕлÿ палăртнă тĕллевсене пурнăçа кĕртме май паракан хăйне евĕрлĕ тĕрев вырăнне пултăр. Малашлăхра сирĕн ĕмĕтĕрсем пурнăçа кĕччĕр, палăртнă çула тивĕçлипе тата савăнăçпа пĕрле утса тухăр! Ăнăçу пултăр сире! - терĕ саламланă май Владислав Константинович.

Çавăн пекех вун пĕрмĕшсене кĕçĕн классенче вĕрентнĕ Надежда Иванова саламларĕ. Ашшĕ-амăшĕ ячĕпе вара Сергей Лаврентьев ачисене пурнăçăн анлă çулĕ çине кăларма пулăшнишĕн, шкул тапхăрĕнче чи çывăх тус пулса тăнишĕн педагогсене тав сăмахĕ каларĕ. Вĕренекенсем те ашшĕ-амăшĕ, учительсем умĕнче парăмра юлмарĕç. Педагогсем те шкулпа сывпуллашакансене валли юрă-ташăллă парне хатĕрленĕ.

Чăваш Сурăмĕнчи вăтам шкултан 11-мĕшĕнчен тата 9-мĕш класран вĕренсе тухакансен ăсату каçне вара Евгений Григорьев шоумен ертсе пынă. Тăван кил пекех çывăх пулса тăнă вĕренÿ учрежденипе сыв пуллашакансене район администрацийĕн пуçлăхĕн социаллă ыйтусемпе ĕçлекен çумĕ - вĕренÿ пайĕн начальникĕ Петр Павлов саламланă. 11-мĕш класс пĕтерекен 9 ачана, 9-мĕшĕнчен тухакан 13 вĕренекене малашлăхра та çитĕнÿсем тума çирĕп сывлăх, ăнăçу суннă. Ашшĕ-амăшĕ ячĕпе 11-мĕшсенчен Инга Игнатьева, 9-мĕшсенчен Надежда Сергеева тав сăмахĕ каланă. Чăваш Сурăмĕнчи пĕтĕмĕшле пĕлÿ паракан вăтам шкул директорĕ Зоя Васильева вĕренÿ учрежденийĕн пурнăçне хастар хутшăннă ашшĕ-амăшне Тав çырăвĕсемпе чысланă. Ачасен пĕрремĕш вĕрентекенĕсем, класс ертÿçисем тухса калаçнă.

Ăнăçу пултăр сире, выпускниксем! Мĕн пур ĕмĕтĕр пурнăçа кĕтĕр!

Э.ЭЛИНА.