29 июня 2018 г.
Июнь уйăхĕ шкулпа сыв пуллашакансемшĕн анчах мар-ха, аслă вĕренÿ учрежденийĕсенчен вĕренсе тухакансемшĕн те пурнăçра яваплă йышăну тумалли самант. Çулсеренех июнь уйăхĕнче тĕп хуламăрти Чăваш патшалăх университечĕ вĕренÿре палăрнă, аслă вĕренÿ учрежденийĕн обществăлла пурнăçне пысăк тÿпе хывнă ĕнерхи маттур студентсене «Чи лайăх выпускник» свидетельствăсем парса чыслать. Çакна асăнса хăвармалла, чи лайăх выпускниксен шутĕнче вара Элĕк яш-кĕрĕмĕ те пур. Тантăшĕсемпе пĕрле Элĕкри Юра Чашков тата Вутланти Сергей Иванов çак пысăк хисепе тивĕçнĕ. Кăçалхи уяв вара ытти çулхисенчен темĕн чухлĕ савăнăçлăрах та пĕлтерĕшлĕрех пулнине асăнмалла. Аслă вĕренÿ учрежденийĕнчен 50-мĕш вĕренсе тухакан çамрăксем çитес ăрусем - малашлăхри студентсене валли Чăваш патшалăх университечĕн тĕп корпусне кĕмелли çĕрте çыру çырса «Вăхăт капсулине» хунă.
Студентсене вĕренĕве вĕçленĕ ятпа саламлама тата свидетельствăсем пама Чăваш Республикин Министрсен Кабинечĕн Председателĕ Иван Моторин, Раççей Федерацийĕн Федераци Пухăвĕн Патшалăх Думин депутачĕ Леонид Черкесов, Вĕренÿпе çамрăксен политикин министрĕ Александр Иванов килнĕ. Çавăн пекех выпускниксене Чăваш патшалăх университечĕн ректорĕ Андрей Александров та саламласа малашне те хастарлăхпа палăрма сĕннĕ.
(Хамăр инф.)