21 августа 2018 г.
Ача çурални - кашни çемьешĕн пысăк савăнăç, çемье историйĕн çĕнĕ страници. Çав летопиçра телейлĕ самантсем хушăнсах пыраççĕ: пĕрремĕш кулă, ача пĕрремĕш хут макăрни, малтанхи утăмсем, çавăн пекех ÿсĕмĕсем.
Çак кунсенче район администрацийĕн ЗАГС пайĕнче 55-мĕш ача çуралнине регистрациленĕ. Какаç ялĕнче пурăнакан Игорь Михайловичпа Елена Валерьевна Григорьевсен çемйинче телейлĕ пулăм - вĕсен Самина хĕрача çут тĕнчене килнĕ. Çав ятпа çемьене ЗАГС пайĕн начальникĕ Любовь Артемьева саламланă. Вăл çамрăк ашшĕ-амăшне хĕр пĕрчин пĕрремĕш документне - çурални çинчен свидетельство панă. Хĕрачана çирĕп сывлăх, ашшĕ-амăшне пĕр-пĕрне ăнланса пурăнма ăнăçупа телей суннă.
Çав кунхинех ЗАГСра тата тăватă пепке çуралнине шута илнĕ.