24 августа 2018 г.
Хĕрÿ ĕççи пынă вăхăтра уй-хире агитбригадăпа тухасси чылай çул каяллах йăлана кĕнĕ. Çак кунсенче Ураскилт ял тăрăхĕнчи юрă-ташă ăстисем ку енĕпе пуçарулăх кăтартнă.
Вĕсем Николай Ильин ертсе пыракан «Серебряные ключи» хуçалăх уйĕсенче пулнă. Кунта вырма ĕçĕсем кал-кал пыраççĕ. Андрей Григорьевский, Михаил Чертов, Андрей Никитин комбайнерсем, Валерий Алексеев, Николай Ильин механизаторсем вăй-хала шеллемесĕр ĕçлеççĕ. Хастар ĕçченсене «Çăлкуç» фольклор ушкăнĕ юрă хыççăн юрă шăрантарса саламланă. Çавна май хастар ĕçченсен кăмăлĕ те çĕкленнĕ. Вĕсем пĕр вăхăт канса илнĕ хыççăн ĕçе пысăк хавхаланупа кÿлĕннĕ.